كان عندي مدرسة وانا عندي ٩ سنين، كانت مؤذية جدا وبتعدي لفظيا علينا في الفصل.
حرفيا كانت بتستغل سلطتها علي الأطفال اللي بتدرسهم.
في مرة حصل معايا موقف معاها وتنمرت عليا قدام الفصل كله، عمري ما نسيت هي قالت ايه وازاي فضلت تزود التريقة بهدف إنها تضحك الفصل.
بس النهارده اللي جايه اثبتهولك هو إن رغم إنها من أكتر الناس اللي اذتني، إلا إنها من أكتر الناس اللي اتعلمت منها.
هديك كذا درس اتعلمته منها :
أول درس: إني عمري ما أبقي زيها
دي من أكتر الدروس المهمة اللي اتعلمتها، في ناس لما بشوفها بحس إنهم بيلهموني اغير من نفسي عشان مبقاش زيهم.
لإني شفت ازاي كل اللي حواليهم بيكرهوهم وبينافقوهم في وجودهم، ودقت إحساس التجربة اللي هي حطتني فيها واللي اختارت إني معيشها لحد غيري.
تاني درس: زي ما الكلمة الحلوة بتثبت، الكلمة الوحشة بتتحفر
اتعلمت ازاي الكلمة ممكن تغير حياة بني آدم، اتعلمت إني أقول الكلمة الحلوة يا اما اسكت.
لو اللي قدامي مش هيقدر يغير الحاجة اللي هعلق عليها في ٣٠ ثانيه، مش هقولها.
واللي فكرني بموقف وانا طفلة لما واحدة كان عندها ٢٠ سنه جت علقت علي حاجه في ملامحي وقالتلي إنها شكلها حلو.
والمفاجأه إن عمري ما نسيت كلمتها، كل ما بفتكر باقي ممتنه إن في ناس شبهها.
عشان كده بحاول ابقي زيها.
تالت درس: انت اللي بتقرر تبص للدنيا ازاي
فضلت فترة كبيرة بزعل أوي كل ما بفتكر، لغايه ما في لحظة بجد بصيت لنفسي في المرايه، وقررت إن ليه أخلي شخص مريض يخليني أشوف نفسي بعينه.
قررت اتخلي عن فكرة إن لازم كل الناس تحبني عشان احس إني استحق الحب.
اخر درس: متبقاش سبب إن شخص ميقدرش يحب نفسه
ناس كتير أوي بتتجاهل فكرة إن كلنا بنحاول، سواء بنحاول في ايه، متبعش لشخص ببصه دونيه لمجرد إنك مش شايف حياته كاملة.
ما شاء الله بحب طريقة تفكريك ومقالاتك كل الحب والدعم
اتفق بشدة ان تحب نفسك و ان ترى نفسك جميل رغم كل شيء هو أجمل شيء يمكن أن تقدمه لنفسك