جربت حاجات كتير جدا في محاولة مني إني أفهم نفسي،
وفي النص جربت حاجات منجحتش تماما .
ف النهارده هشارك معاكم أكتر الطرق اللي بجد ساعدتني أفهم نفسي، ردود أفعالي، وليه بتعامل بالطريقة دي.
الحاجات اللي هقولها هنا كلها تجارب شخصية،
ممكن تنفعك وممكن متبقاش مناسبة ليك، عشان كل واحد فينا تجربته وقصته مختلفة.
خلينا نبدأ ،
اكتب يومياتك:
انا اي حد عارفني أو اي حد متابعني هيكون عارف إني شخص بعشق الكتابة، بس المفاجأة هي إني زمان مكنتش كده.
مكنتش بقدر اعبر عن اي حاجه بالكلام أو حتي بالكتابة، مكنتش بقدر اكمل محادثه عاديه جدا.
الكتابة من اكتر الحاجات اللي ساعدتني فعلا افهم نفسي.
طيب اكتب ايه؟
في ناس كتير بتكسل تكتب عشان هي فاكرة الكتابة رص كلام وخلاص، من وجهة نظري إنها لو استخدمت صح بتطور الشخص اجتماعيا ونفسيا وكل شئ.
لما بدأت اكتب كنت كل يوم بكتب ايه اللي حصل في يومي، ايه اللي ضايقني وايه اللي فرحني سواء حاجات عملتها ف فخورة بنفسي أو حاجات حصلتلي ف مبسوطة إنها حصلت،
بعدها المرحلة التانيه وهي إني كنت كل يوم بجاوب علي سؤال عن نفسي، هتسألني اجيب منين اسئلة، هقولك ادخل علي حاجه زي بنترس واكتب بس journal prompts.
هتلاقي مواضيع كتير جدا تتكلم عنها.
زي مثلا ممكن تلاقي سؤال، ايه احسن يوم في طفولتك، تبدأ تفتكر ايه هو اليوم ده وليه كان الأحسن وكذلك.
هتلاقي مع الوقت انت بتفتكر نفسك، بتذكر نفسك بيك، بايامك الحلوه او حتي حاجات تخطيتها كنت فاكر انها مستحيله
حلل اللي بتشوفه:
حاجه مفيدة جدا جدا ميشوفش ناس كتير بيتكلموا عنها، الفيديوهات اللي بتشوفها، عمرك سألت ليه عجبك؟
شفت فيديو خلاك عيطت، عمرك سألت انت ليه اتاثرت؟
اسال نفسك عن كل حاجه، ليه كذا عجبني، ليه لما حد كلمني كده معجبنيش، ليه بعيط في لما بتوتر.
حاجات كتير جدا لو بس انت عرفت ليه بتعمل كده بيبقي نص المشكلة اتحل.
زي ليه الحكمة دي عجبتني، ليه حسيت بانجذاب ناحيه الشخص ده، بتبدأ تبني انماط ل ليه ممكن تكون بتعمل حاجه بتدمرك مع الوقت بس في دوشة الدنيا ممكن متكونش واخد بالك منها
اتكلم :
عندي واحده صاحبتي من اكتر الناس اللي بحبها وكل ما نشوف بعض لازم نقعد نسأل بعض عن ازاي شايفين نفسنا، ازاي شايفين بعض، ايه اكتر حاجه بنحبها، ايه كتر حاجه بتخوفنا وكذلك.
الموضوع بيوريك منظور مختلف تماما عن اللي انت شايفه لنفسك، ف بدل ما بنتكلم عن الناس ومين عملت ايه بقينا نحب نتكلم عن بعض وعن ايه احسن واوحش حاجه في بعض.
الموضوع جميل جدا لإن اول حاجه بيساعدك
تفهم نفسك،
تشوف الدنيا من منظور مختلف زي اختلاف الآراء في المواضيع الشخصية،
و بيساعدك تتعلم تعبر، لإنك لما تعبر لحد لتحبه عن حاجات بسيطة كل مره ، انفتاحك انك تبقي حر في تعبيرك بيزيد مع الوقت، لإنك متبتبقاش خايف وحاسس بالشفقة.
ده غير إنه بيساعد جدا تشوف فعلا الناس اللي بتحبهم، تفهمهم اكتر وتعرف بجد تحبهم بطريقتك وطريقتهم في الحب
جرب:
من كام يوم سمعت فيديو بيقول، مش يمكن انا موهوب جدا في الكتابة بس انا بس مجربتش؟
أو يمكن انا هحب الصيد حدا بس برضو مجربتش.
كام فرصة و فرحة ضاعت عليك بسبب إنك خايف تجرب ومتعجبكش، طب وافرض عجبتك؟
انا مش الناس اللي بكره فكرة إني اتحط في صندوق، لما حد يسألني عن نفسي مش عايزه يكون الرد جملة، عايزة افضل اجرب واتغير طول حياتي.
لإن الإنسان متحف لتجاربه.
الإنسان لما بيجرب حاجه جديدة هو مش بس بيجرب الفعل، هو بيضيف جزء جديد لهويته.
يمكن يحبه ويحب الناس اللي يتعرف عليها بسببه أو حتي يمكن ميحبوش، بس في الآخر هيبقي القرار ليه هو، مش لكلمة لو كنت.
غير إن انا مؤمنه بمقولة إن جزء منك هيفضل غير مستكشف تماما غير لما تقابل شخص معين، التجارب والسفر والهوايات بتفتحلك وتوسعك الدايره بيخليك تتعامل مع جميع الطبقات، الأعمار، العروق، وحتي الفكر.
بيخليك تفهم حاجات يمكن عمرك ما جالك الوقت تقف وتوصلها
يمكن بجد عمرنا ما هنفهم نفسنا مرة واحدة،
بس كل مرة بنسأل نفسنا "ليه؟" بنقرب ولو خطوة من الشخص اللي نفسنا نكونه.
فيكي تعمليلنا بوست عن الأسئلة اللي نطرحها لبعض (بين الأصحاب )
جاي في وقته 😭💕