"لو انت متأكد جدا احرق المركب" - “If you’re so sure burn the ships”
من أكتر الجمل اللي بجد بحبها جدا وبتساعدني.
تاريخ الفكرة:
لينا نتكلم عن تايخ الجملة اصلا، الفكرة بترجع للمستكشف الإسباني Hernán Cortés لما وصل إلى المكسيك امر الجنود يحرقوا السفن بعد الوصول لأرض العدو عشان ميقدروش يتراجعوا ، فيتبقي قدامهم خيار واحد وهو الفوز. (دي الرواية المشهورة رغم أن التفاصيل التاريخية الدقيقة ممكن تكون محل نقاش أو شك)
هل المشكلة هي القرار ولا التردد؟
بس مش تاريخ الفكرة هو موضوع النهاردة، موضوع النهاردة هو ازاي الفكرة دي بتساعدني جدا.
من فترة كنت بمر بفترة عصيبة جدًا بسبب موضوع في حياتي.
الموضوع ده بعاني منه من أكتر من سنة أو سنتين، وكانت دايما مشكلتي في الموضوع هو إني بجد مترددة جدا ناحية القرار.
بس في فترة قريت الجملة دي، وكانت مصدر الهام بالنسبالي كبير، أول مرة قريتها، خلتني قربت أكتر، قربت من فكرة إن سواء القرار غلط أو صح لازم أخد ناحية. مينفعش ابقي حيادية وافضل واقفه في النص.
ليه الحسم مريح؟
ساعتها أخدت القرار، عايزة اقول إن قد ايه انا حسيت براحه بعد القرار ده.
راحة من ناحية ايه؟ من ناحيه اني حتي لو اخدت القرار الغلط هتحمل عقباته ولو كان القرار صح برضو هتحمل عقباته.
فكرة إنك مش واقف في اللا شئ، لإن اكتر حاجه عقل الإنسان بيكرها هي المجهول.
مع التوتر المستمر من عدم معرفه نتيجة وقفتك في النص، معندكش اي معلومه انت هتقدر تتخطي التوتر وعدم الامان لغايه امتي.
ساعات بقول لنفسي ما كان ممكن اعمل كذا.
بس ساعتها بدرك إن راحه القرار أحسن ١٠٠٪ من التشتت المستمر بين الناحيتين.
علاقة دايما بتخليني مش مرتاحة، مش هفضل كل شوية أفكر في البعد لا أخد القرار وابقي قده يا هبعد يا هقرر افضل
.
هل حرق السفن دايما الحل ؟
بس الدنيا مش دايما ابيض واسود.
في علاقات زي الأهل مينفعش إني اقطع مثلا، في علاقات زي المدرسين وكذلك.
ساعات العلاقة في النص بتبقي الحل الأمثل.
فحرق السفن مش معناه قطع كل حاجه، بس معناه انك تبطل تردد بعد اختيار القرار المناسب ليك.
الحسم مش معناه إنك مش هتندم أبدا،
بس معناه انك هتوقف استنزاف لنفسك بين كل الاحتمالات.
بس احس اني راح ادفع الثمن القرار مهما كان واقد واقفه افكر من الافضل والاقل ضرر؟ مابعرفش فا اقعد انتظر في اللاشيء تقريبا، ذي مشكلة حياتي واي قرار أخذه اندم عليه
في رأي الحل هوا صلاة الاستخارة فهيا موجودة عشان ادا في اي قرار مترددين فيه و مانعرف وش القرار الصحيح فنطلب من ربنا يوفقنا للخيار الصحيح