ازاي بظلم المظلوم بدفاعي عنه

من فترة كنت واقفة مستنيه الاوردر بتاعي، لقيت تلاته بيتخانقوا قدامي، أو عشان أكون دقيقة اتنين بيتخانقوا وواحد بيصلح.
المشكلة كانت إن واحد فيهم بيتم اتهامه إنه اتكلم الشخص اللي بيتخانق معاه، الولد قال محصلش وقعد يحلف،
بس اللي استغربته إن صاحبهم التالت اللي كان بيحل، راح قايل جملة غريبة.
قال : يعم ده مستحيل يقول عليك كده، ده هو اصلا شخصيته ضعيفة مش هيتجرأ يتكلم قدام.

ساعتها استغربت جدا، واضح إن التلاته صحاب يعني اوي، مش مجرد زمايل.
بس اللي الشخص مادش باله منه إنه ظلم المظلوم بتريقته عليه.

دي حاجه لاحظتها كل ما الاقي حد بيدافع عن حد يروح قايل صفة وحشة، يعم ده مستحيل يعمل كده انت مش شايف جسمه، شكله،….

ساعتها بدأت اركز وانا بدافع، هل بدافع فعلا، ولا بقول اكتر عيب في الشخص يمنعه إنه يعمل الحاجه اللي بيتم اتهامه بيها.