هل نجاح غيرك بيقلل منك؟

خليني احكيلكم موقف حصل معايا، انا من نوع الناس اللي بتهتم جدا بدراستها، وساعات بتوصل اني اقفل تليفوني بالأيام عشان بس اركز في الدراسة.
المهم درجاتي طلعت من فترة وكالعادة بسأل صحابي ايه الدنيا وعملوا ايه وكده.
ف في واحده صاحبتي جابت درجة مش كويسة، بس مكنتش دي المفاجأة، المفاجأة إنها بتصلي في عيني وقالتلي انا ليه اجيب اقل منك وانا عملت نفس الحاجة.

في نظرية كده انا مقتنعة بيها وهي ان تركيزنا متوزع، بس انت بتقرر توزعه علي نفسم ولا تقسمه بينك انت وغيرك.
لما فكرت شوية افتكرت طب ما هي جابت اعلي مني في اللي فات ورغم كده حتي اصلا مجاش في بالي درجتها كل اللي جه في بالي ازاي أحسن عشان الإمتحان الجاي.

ودي من أكتر الحاجات اللي بحس سوشيال ميديا بتغذيها جدا: المقارنة.
ومن أكتر الحاجات اللي بحاول ابعد نفسي عنها، لإن انا عندي اقتناع إن عمر ما حد هيعرف شخص تاني بالكامل، احنا بنمر بصراعات حوالينا سواء مع الأهل، الصحاب، أو حتي بينك وبين نفسك.

انا فاكرة في مرة واحدة صاحبتي جاتلي وقالتلي، "هو انا حياتي لو زيك عمري ما هشتكي"
ساعتها استغربت جدا الكلمة ومفهمتش اصلا ليه حياتي في مقارنة مع حياتك، ساعتها رديت عليها وقلتلها "ياريت وانت بتتمني، تتمنيها كلها متختاريش بس اللي عجب من برا" بس كلمتها بينتهي قد ايه في ناس بتبقي عينها في حياة غيرها لدرجة إنهم بينسوا يفكروا في نفسهم.

لو انت قعدت تفكر غيرك وصل لإيه، عمرك ما هتعرف تفضي دماغك عشان تفكر في انت نفسك توصل لإيه.

---

المواقف دي خلتني افكر في سؤال واحد: ليه في ناس شايفه إن نجاح غيرهم بيقلل منهم؟
بشوف إن من أهم الأسباب إن الشخص غالبا مايبقاش واثق في نفسه، ف بيبقي باني كل نجاحه علي إنه احسن واحد في اللي حواليه، أول ما حد منهم بيبدأ يبان كويس، الشخص ده بيحس بالتهديد ناحيه مكانه، بل وممكن يوصل لكره الشخص كمان.

في مره حد قالي هو قد ايه مضايق انه طلع التاني، سألته علي درجته قالي انا ناقص نص درجة قلتله طيب ايه اللي مزعلك، قالي إني طالع التاني.
ساعتها بصيته وقلتله هل لو الأول مكنش موجود كنت هتبقي مبسوط أكتر قالي طبعا، قلتله يبقي انت مش مداي انك نقصت النص درجة، انت مضايق بس إن في حد احسن منك. قالي ايوا.

ساعتها افتكرت مثل كنت قريته "لو الطائر مكانش موجود، هل كان الإنسان هيفكر يخترع طيارات؟"

كل ما بلاقي نفسي بقارن بفتكر الجملة دي،
هل لو الشخص الأعلى مني مكانش موجود كنت هبقي مبسوطة بمجهودي ولا لا؟

يمكن المشكلة عمرها ما كانت في اللي سبقنا،
بس يمكن كانت في إننا وقفنا نبصله أكتر ما بصينا لنفسنا.