اولو العزم هم خمسة من أعظم الأنبياء والرسل وواكترهم تحملا وصبر في سبيل الدعوة.
وده برأي جمهور العلماء.
مين هما ؟
نوح عليه السلام
إبراهيم عليه السلام
موسى عليه السلام
عيسى عليه السلام
محمد ﷺ وهو خاتم الأنبياء
طيب نمشي علي نبي نبي نشوف اهم موقف صبر ليه، وايه المعجزه بتاعته.
نبدأ ب نوح عليه السلام:
اللي معروف بـ “شيخ المرسلين”، وده لكذا سبب.
أولهم إنه عاش عمر طويل جدا ، وفضل يدعي قومه عشان يعبدوا ربنا لمدة 950 سنة، وكان بيدعيهم في الليل والنهار والسر والجهر، ورغم كل ده ما آمنش معاه إلا عدد قليل بس ، وكانوا كمان بيؤذوه وبيقللوا منه وكدبوه.
﴿قَالَ رَبِّ إِنِّي دَعَوْتُ قَوْمِي لَيْلًا وَنَهَارًا﴾ (سورة نوح، الآية 5)
﴿فَلَبِثَ فِيهِمْ أَلْفَ سَنَةٍ إِلَّا خَمْسِينَ عَامًا﴾ (سورة العنكبوت، الآية 14)
وده غير إنه من أقدم الرسل، واول رسول ربنا بعته بعد ما الكفر انتشر بين الناس.
طب ايه هي بقا معجزة سيدنا نوح عليه السلام؟
هي السفينة والطوفان.
ربنا أمره يبني سفينة كبيرة، رغم إنه كان بعيد عن البحر، فقومه فضلوا يتريقوا ويقللوا منه ويقولوا: إزاي بيبني سفينة في المكان ده؟
بس لما جه أمر ربنا، نزل الطوفان ، فربنا ساعتها نجي نوح عليه السلام وكل اللي امنوا معاه على السفينة.
﴿وَاصْنَعِ الْفُلْكَ بِأَعْيُنِنَا وَوَحْيِنَا﴾ (سورة هود، الآية 37)
﴿فَأَنْجَيْنَاهُ وَأَصْحَابَ السَّفِينَةِ﴾ (سورة العنكبوت، الآية 15)
ثانيا إبراهيم عليه السلام:
اللي معروف بـ “أبو الأنبياء”.
وده لأن عدد كبير من الأنبياء جم من ذريته، زي إسماعيل وإسحاق ويعقوب عليهم السلام.
وربنا بعته لقوم كانوا اصلا بيعبدوا الأصنام، وكان ملكهم بيكابر ويدّعي إنه يقدر يحيي ويموت.
ورغم إن سيدنا إبراهيم عليه السلام كان بيكلمهم بالعقل، الا انهم برضو رفضوا يصدقوه.
طيب إيه معجزة سيدنا إبراهيم عليه السلام؟
من أشهر معجزاته هي ان قومه رموه في نار عظيمة، لكن ربنا أمر النار دي إنها تكون بردا وسلاما عليه، فخرج منها من غير أي اذى.
﴿قُلْنَا يَا نَارُ كُونِي بَرْدًا وَسَلَامًا عَلَىٰ إِبْرَاهِيمَ﴾ (سورة الأنبياء، الآية 69)
ومن معجزاته كمان إن ربنا وراه إزاي بيحيي الموتى، عشان يطمن قلبه، فجمع الطيور بأمر من ربنا، وبعدها رجعت للحياة.
﴿قَالَ فَخُذْ أَرْبَعَةً مِنَ الطَّيْرِ...﴾ (سورة البقرة، الآية 260)
ثالثا موسي عليه السلام:
اللي معروف ب “كليم الله”
وده لأنه النبي الوحيد اللي ربنا كلمه مباشرة، من غير مَلَك ينقله الوحي.
﴿وَكَلَّمَ اللَّهُ مُوسَىٰ تَكْلِيمًا﴾ (سورة النساء، الآية 164)
وربنا بعته ل فرعون، اللي كان بيدعي الألوهية وبيظلم بني إسرائيل، عشان يدعيه لعبادة ربنا.
ورغم كل الآيات اللي شافها فرعون، برضو رفض يؤمن بربنا .
طيب ايه معجزة سيدنا موسى عليه السلام؟
من أشهر معجزاته هي ان العصاية بتاعته كانت بتتحول ل ثعبان عظيم بأمر الله، وكمان ايده كانت بتخرج بيضاء مضيئة من غير اي مرض فيها .
﴿فَأَلْقَىٰ عَصَاهُ فَإِذَا هِيَ ثُعْبَانٌ مُبِينٌ وَنَزَعَ يَدَهُ فَإِذَا هِيَ بَيْضَاءُ لِلنَّاظِرِينَ﴾ (سورة الأعراف، الآيتان 107–108)
ومن أعظم معجزاته كمان إن ربنا شقله البحر، فعدي هو وبني إسرائيل، ولما حاول فرعون والجنود بتوعه يلحقوهم، رجع البحر زي ما كان فغرقهم.
﴿فَأَوْحَيْنَا إِلَىٰ مُوسَىٰ أَنِ اضْرِبْ بِعَصَاكَ الْبَحْرَ ۖ فَانفَلَقَ فَكَانَ كُلُّ فِرْقٍ كَالطَّوْدِ الْعَظِيمِ﴾ (سورة الشعراء، الآية 63)
رابعا عيسى عليه السلام:
اللي معروف بـ “روح الله وكلمته”.
وربنا بعته لبني إسرائيل، عشان يدعيهم لعبادة ربنا، ويصحح التحريف اللي حصل في دينهم.
﴿إِنَّمَا الْمَسِيحُ عِيسَى ابْنُ مَرْيَمَ رَسُولُ اللَّهِ وَكَلِمَتُهُ أَلْقَاهَا إِلَىٰ مَرْيَمَ وَرُوحٌ مِّنْهُ﴾ (سورة النساء، الآية 171)
ورغم المعجزات الكتير بقا اللي شافوها، برضو ناس كتير كانوا بيكذبوه وحاولوا يقتلوه، لكن ربنا نجاه ورفعه ليه.
طيب إيه معجزة سيدنا عيسى عليه السلام؟
من أشهر معجزاته إنه كان بيشفي الأكمه( وده الشخص اللي بيتولد اعمي) والأبرص (وهو بياض بيظهر على الجلد ويزيل لونه الطبيعي)، فكان بيحيي الموتى بإذن الله.
﴿وَأُبْرِئُ الْأَكْمَهَ وَالْأَبْرَصَ وَأُحْيِي الْمَوْتَىٰ بِإِذْنِ اللَّهِ﴾ (سورة آل عمران، الآية 49)
وكمان كان بيتكلم وهو لسه طفل في المهد، وبيدافع عن أمه السيدة مريم عليها السلام، ويعلن إنه عبد الله ورسوله.
﴿قَالَ إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيًّا﴾ (سورة مريم، الآية 30)
خامسا واخيرا سيدنا محمد ﷺ:
وهو خاتم الأنبياء والمرسلين، يعني آخر نبي ربنا بعته، ومفيش نبي هييجي بعده.
وربنا بعته للناس كلهم، مش لقوم معين، عشان يدعوهيهم لعبادة ربنا وبس.
ورغم الأذى والحروب والمقاطعة اللي اتعرض لها، فبرضو فضل يدعي الناس للإسلام لحد ما ربنا أتم رسالته.
طيب إيه معجزة سيدنا محمد ﷺ؟
أعظم معجزة ليه هي القرآن الكريم ( وهي معجزة مستمرة) ، لإنه كلام ربنا، ولسه محفوظ زي ما نزل من أكتر من 1400 سنة.
﴿اقْتَرَبَتِ السَّاعَةُ وَانشَقَّ الْقَمَرُ﴾ (سورة القمر، الآية 1)
﴿وَإِن يَرَوْا آيَةً يُعْرِضُوا وَيَقُولُوا سِحْرٌ مُّسْتَمِرٌّ﴾ (سورة القمر، الآية 2)
ومن أشهر معجزاته كمان انشقاق القمر، لما ربنا شق القمر نصين قدام الناس، وبعدها رجع زي ما كان.
﴿قُل لَّئِنِ اجْتَمَعَتِ الْإِنسُ وَالْجِنُّ عَلَىٰ أَن يَأْتُوا بِمِثْلِ هَٰذَا الْقُرْآنِ لَا يَأْتُونَ بِمِثْلِهِ﴾ (سورة الإسراء، الآية 88)
﴿فَاصْبِرْ كَمَا صَبَرَ أُولُو الْعَزْمِ مِنَ الرُّسُلِ﴾ (سورة الأحقاف، الآية 35)
اخت منشوراتك تحفه💗🫶🫶
جميل ما شاء الله