لو كده كده هتعملها، اتبسط بيها.
في وقت في حياتي كنت بكره المدرسة وكنت بحس دايما بإني لوحدي هناك، وكنت كل يوم ببقي كارهه فكرة اني اقضي الوقت ده كله في المكان ده.
لغايه ما في يوم كده صحيت وقررت اني هبقي مبسوطه، ليه هزعل؟
انا عارفه ان ده مش احسن مكان بحب ابقي فيه، وعارفه اني ممكن اعمل حاجات احسن في نفس الوقت
لغايه ما حسيت ان ازاي كل ما كرهي لحاجه بيزيد هي بتبادلني نفس الشعور،
خليني افهمك انا من كتر ما كنت ابقي مدايقه، كنت بتخلي عن فرص كتير المكان ده بيقدمهالي.
زي مثلا الصحاب اللي كنت بخاف اتعرف عليهم، الكتب المتاحه اللي ممكن اقراها هناك، أو حتي الملعب اللي ممكن العب فيه اي رياضه بحبها.
لقيتني بفوت حاجه زي التجمعات في المدرسة، المسابقات، الخروجات، مش لإني مبحبش التجمعات بل لإني متكدرة وزهقانه من اني جيت.
من اكتر الجمل اللي بحبها في حياتي هي “it is what it is” و ببساطه هي معناها اللي حصل حصل.
انت نزلت الخروجة، اتخانقت مع اهلك قبل ما تنزل. ليه تخلي مشاعر المضايقة دي تأثر عالخروجة؟
بتروح الجامعه كل يوم، ليه كل يوم بتشتكي انك بتصحي بدري؟
لو كده كده هتذاكر، ليه كل ما تقوم تكره نفسك في الموضوع؟
ساعات بس لو غيرنا الصيغة اللي بنقول بيها الكلام هنلاقي اننا بنتبسط بابسط الحاجات،
بدل ما تشتكي من الصحيان بدري شوفها فرصة تظبط يومك.
بدل ما تشتكي من صعوبة المنهج، شوفها فرصة توسع افق دماغك.
بدل ما تشتكي من المدرسة، شوفها فرصة لتكوين اي ذكريات ووقت تتبسط فيه
لو اخدت كل حاجه في حياتك كأنها رحله، بدون انتظار نتيجة.
هتفضل مبسوط.
وهنا انا مش بحرض علي ال"الإيجابية السامة" بس بقول اختار انك تبقي مبسوط، اختار إنك تشوف الحلو في حياتك
في موقف مهم جدا في حياتي وكنت لابسه تيشرت ابيض العصير اتدلق عليا، مكانش في اي مجال اني اغير، وكان لازم احضر كده،
كنت بين اختيارين
اقعد اعيط أو حتي ازعل ان ده حصل معايا.
اتقبل الوضع اللي حاليا مش هعرف اغيره واحاول استمتع بالمكان اللي انا فيه.
هكون بكدب عليك لو قللت اني اخترت الاختيار التاني بشكل كامل، انا فعلا اتضايقت جدا ودخلت التواليت ادور علي اي حل وكنت بعيط، لغاية ما بصيت في المرايه وقلت لنفسي "هل عندك حل دلوقتي؟ " والإجابه كانت لا ساعتها اخترت اني اتبسط وحتي اهزر عالموضوع عشان اقلل من اثره عليا.
اختار انك تستمتع بالرحلة مش بس عشان مستني النتيجة.
يمكن الرحلة هي النتيجة
مبسوطة اوي إني قرأت ده دلوقتي
بعد ما بقيت بشوف كل حاجة معقدة وصعبة، حسيت إني مرتاحة بعد ما قرأت كلامك وخصوصًا بسبب إنك بتكتبي بالعامية عادي كأننا قاعدين بنتكلم سوا
شكرًا إني لمست في كلامك جزء قديم مني كنت بدور عليه.💗💗💗
شكرا.
انت تكتب ولا تعلم من سيقرأ كلامك ويشفى كأن الله بث فيه انعاش احياها من جديد 🙏🏾🪷