تخيل إن فيه 10 أطفال، و10 قطع شوكولاتة، وكل طفل معاه كوبون واحد.
ف بما إن فيه 10 كوبونات و10 شوكولاتات، فكل طفل يقدر يشتري قطعة.
دلوقتي تخيل بقا إننا طبعنا كوبونات زيادة، وبقى مع كل طفل كوبونين بدل واحد.
في البداية هيبنلك إن كل طفل بقى يقدر يشتري قطعتين، لكن المشكلة إن عدد الشوكولاتات لسه 10 بس. يعني كمية الفلوس زادت، لكن كمية السلع نفسها مزادتش.
هنا الأطفال هيبدأوا يتنافسوا على نفس الـ10 شوكولاتات، وصاحب الشوكولاتة هيلاقي في ناس مستعدة تدفع كوبونين بدل كوبون واحد، فيرفع السعر.
ومع الوقت يستقر السعر الجديد عند كوبونين لأن ده بقى السعر اللي بيحقق توازن بين العرض والطلب.
وده بسبب قانون العرض والطلب
(Supply and Demand):
لما الطلب (Demand) يزيد أسرع من العرض (Supply)، الأسعار بتزيد.
يعني ببساطة:
الفلوس زادت.
لكن السلع والخدمات ما زادتش.
فالأسعار هي اللي ارتفعت.
وده هو التضخم (Inflation)
طيب ليه المورد أو البياع يرفع السعر اصلا؟
لأن عدد الناس اللي عايزة تشتري بقى أكبر من عدد المنتجات المتاحة، فالسوق نفسه يزق الأسعار لإنهم يزيدوا لحد ما يرجع فيه توازن بين العرض والطلب.
بعد كده يبدأ المورد يحاول يزود الإنتاج عشان يلحق الطلب، فيحتاج:
خامات أكتر.
عمال أكتر.
نقل وطاقة وتشغيل أكتر.
ف في نفس الوقت، العمال بيلاقوا إن الأسعار زادت، فيطالبوا بزيادة المرتبات عشان يحافظوا علي القوة للشرائية بتاعتهم (Purchasing Power)، لأن الرغيف اللي كان بـ10 جنيه بقى بـ20 جنيه.
ف لما المرتبات وتكاليف الإنتاج بتزيد، بيبدأ المورد يرفع الأسعار مرة تانية، فتبدأ دايرة اسمها دوامة الأجور والأسعار (Wage–Price Spiral):
طباعة فلوس → زيادة المعروض النقدي (Money Supply) → زيادة الطلب (Demand) → زيادة الأسعار (Inflation) → زيادة المرتبات أو الأجور → زيادة تكاليف الإنتاج → زيادة الأسعار مرة تانية.
في النهاية، الناس هيبقي معاها فلوس أكتر بالأرقام، لكن مش بالضرورة تقدر تشتري بيها حاجات أكتر، لأن القوة الشرائية للعملة نفسها قلت.
ببساطة يعني
الدولة مبتغتنيش بطباعة فلوس، بس بتغتني لما انتاجها الحقيقي أو (Real Output) يزيد سواء من المنتجات وخدمات اللي الدولة دي بتقدمها.
لأن الثروة الحقيقية هي اللي البلد بتنتجه، مش بس عدد الفلوس اللي بنطبعها.
مراجع تقدر تقرأ منها عن الموضوع ده:
ياربي اول مره اعرف الحوار ده و بجد استفدت منه جدا كتري من الحجات دي لاني عايزه اتعلم اكتر و اكتر فيها بجد شكرا اوي بحبكككك
جميل جدا