من يومين وريت صاحبتي صورة صورتها، قالتلي انت دايما الصور اللي بتاخديها حلوة جدا اتعلمتي ازاي؟
اللي فاجئتها بيها هي اني عمري ما اتعلمت اني اصور.
طب ازاي؟
في حاجه طول حياتي انا مقتنعة بيها وبعملها وهي إني اي حاجه اعملها تبقي بتعبر عني وعن مشاعري.
خليني افهمك، لو انا مثلا عايزة اصور، اول حاجه بتبقي في دماغي هي إن ازاي اخلي الشعور اللي الصورة بتديهولك هو نفس الشعور اللي انا حاسه بيه.
خليني اديلك مثال تاني، انا بحب جدا اكتب، ف لما باجي اكتب بحاول إن اول حاجه توصل للي بيقرأ هو مشاعري وانا بكتب ومشاعري عن الموضوع ده.
الموضوع ده مش بس بخليك يبقي ليك شكل خاص وشعور خاص كل اللي حواليك بيحسوا بيه، بل كمان التعبير عن اي هوايه مثلا في حياتي من خلال مشاعري بيخليني صادقة مع نفسي وفهماها اكتر بكتير
طب ازاي اقدر اعمل كده؟
اول حاجه تحاول تعملها انك وتغشش من غيرك، وهنا الغش مش معناه الإستعانة بمصدر.
بس معناه إن يبقي عندك صوتك، يعني خليني اديك مثال، انا بقرأ كذا مقال عن نفس الموضوع من كذا كاتب، بعدين بكتب نقاط مهمه من وجهه نظري وابدأ اكتب كل حاجه بطريقتي بدون الاستعانه تاني او قراءة المقال تاني عشان تتفادي اني ابقي متأثرة باللي بقرأه.
طب هل التعبير عن المشاعر كفاية ولا محتاج مهارة كمان؟
انا بشوف إن الموضوع ٨٠٪ مثلا مشاعر و ٢٠٪ مهارة.
خليني اديك مثال، لو انت بتحاول تبقي كاتب، لازم تتعلم الأساسيات زي اللغة والترابط. بس لو اتعلمت دول وكتبت بس ورفضت مع تعلم المبادئ تطوير صوتك الشخصي هتبقي زي اي حد وعمرك ما هيبقي ليك تأثير.
بس لما تتعلم إنك تستفاد من تجاربك ومشاعرك في التعبير، ناس أكتر هتقدر تحس إنك بتعبر عنهم ده مع قدرتك علي التعبر عن نفسك.
من الآخر، خلي دايما هدفك في اي حاجه انك تبقي بتعبر عن نفسك من خلالها.
"الفن ليس ما تراه، بل ما تجعل الآخرين يروه"
تحفة المقال بجد اللهم بارك 💗
Keep going girll